பிள்ளைகளால் நிராகரிக்கப்படுகிறார்களா பெற்றோர்கள்? – மனம் திறந்த வைரமுத்து
சென்னை ஜெய்ஸ்ரீ ஓம் சக்தி ஹோம் கேர் நிறுவனத்தின் புதிய அலுவலகத்தை திறந்து வைத்து கவிஞர் வைரமுத்து பேசினார்.
அப்போது அவர் கூறியதாவது:
> “ஜெய்ஸ்ரீ ஓம் சக்தி ஹோம் கேர் போன்ற நிறுவனங்கள் இன்றைய காலத்தின் அத்தியாவசியம். இதை நிறுவிய நிர்வாக இயக்குநர் எழிலரசு அவர்கள் காலத்தின் தேவையை நன்கு உணர்ந்தவர். இன்றைய காலத்தில் கணவன்–மனைவி இருவரும் வேலைக்கு செல்லும் குடும்பங்கள் அதிகரித்துள்ளன. இதனால் வீட்டு பணிகள், குழந்தைகள் பராமரிப்பு, முதியோர் கவனிப்பு போன்றவை செய்ய ஆளில்லாத நிலை உருவாகி வருகிறது.
மேல் நாடுகளில் ரோபோக்கள் மூலம் வேலைகள் செய்யப்படும் நிலை உருவாகி வருகிறது. ஆனால் நம் நாட்டில் இன்னும் மனிதநேயத்துடன் தொண்டு செய்யும் நம்பகமான பணியாளர்கள் இருக்கிறார்கள். அவர்களை வீடுகளுக்கு அனுப்பி வைத்து சேவை செய்யும் இந்த நிறுவனம் மிகுந்த முக்கியத்துவம் வாய்ந்தது. இவ்வாறான சேவை இல்லாமல் சமூகம் இயங்க முடியாது. இந்த நிறுவனத்தின் சேவை நாளுக்கு நாள் வளரட்டும், நீடிக்கட்டும் என்று நான் வாழ்த்துகிறேன்.”
அவர் மேலும் கூறினார்:
> “தாயையும் தந்தையையும் பராமரிக்கக் கூடாது என்று யாரும் நினைப்பதில்லை. ஆனால் காலத்தின் அழுத்தம், வேலைப்பளு, நேரம் பற்றாக்குறை ஆகிய காரணங்களால் பலர் அதைச் செய்ய முடியாமல் தவிக்கிறார்கள். இதனால் பெற்றோர்கள் பல இடங்களில் புறக்கணிக்கப்படுகிறார்கள். அந்த நெருக்கடியை சமூகம் எதிர்கொண்டு வருகிறது.
இந்நிலையில், முதியோரைப் பராமரிக்கவும், குடும்பத்தின் தேவைகளை நிறைவேற்றவும் இத்தகைய நிறுவனங்கள் பெரும் பங்கு வகிக்கின்றன. மகனும் மகளும் செய்ய வேண்டிய பணி ஒன்றை இதுபோன்ற நிறுவனங்கள் செய்து வருவது பாராட்டத்தக்கது” என்று வைரமுத்து தெரிவித்தார்.
இவ்விழாவில் ஓய்வு பெற்ற டிஜிபி ஆர்.சேகர் IPS தலைமை தாங்கினார்.
சிறப்பு விருந்தினர்களாக திரைப்பட இயக்குநரும் நடிகருமான இ.வி. கணேஷ்பாபு, இயக்குநர் சாட்டை அன்பழகன், கவிஞர் சிவராஜ், இசையமைப்பாளர் ரமேஷ் ராஜா ஆகியோர் கலந்து கொண்டனர்.
இவ்விழாவின் ஏற்பாடுகளை நிறுவனத்தின் சென்னை அலுவலக இயக்குநர் கவிஞர் இளங்கதிர் செய்திருந்தார்.