“உலக மேடைக்கு ஏறும் ‘கெவி’: கிராமத்தின் குரலை உலகம் கேட்கச் செய்கிற சர்வதேச இசை முயற்சி!”

“உலக மேடைக்கு ஏறும் ‘கெவி’: கிராமத்தின் குரலை உலகம் கேட்கச் செய்கிற சர்வதேச இசை முயற்சி!”

 

சமூக நியாயத்தைக் கேள்விக்கிடமாக்கும் தமிழ் திரைப்படங்கள் உலகளாவிய கவனத்தை ஈர்க்கும் தருணத்தில், இயக்குநர் தமிழ் தயாளன் இயக்கிய ‘கெவி’ திரைப்படம் புதிய கட்டத்தை எட்டியுள்ளது. உள்ளூர் கதையை உலக மேடைக்கு கொண்டு செல்லும் நோக்கில், இந்த படக்குழு தற்போது சர்வதேச இசை ஒத்துழைப்பை முன்னிறுத்தி வருகிறது.

மூன்று முறை கிராமி விருது பெற்ற இசையமைப்பாளர் Ricky Kej இந்த முயற்சியில் இணைந்திருப்பது, படத்திற்கு உலகளாவிய பரவலுக்கு வலுசேர்க்கும் முக்கிய நிகழ்வாக பார்க்கப்படுகிறது. குறிப்பாக ‘Set Me Free!’ என்ற சிறப்புப் பாடல், ஒரு பாடலாக மட்டும் இல்லாமல், ஒடுக்கப்பட்ட சமூகங்களின் உணர்வுகளை உலகத்திற்கு எடுத்துச் செல்லும் குரலாக வடிவமைக்கப்பட்டுள்ளது.

நிர்வாகத் தயாரிப்பாளர் சுமதி ராம் முன்னெடுத்து வரும் இந்த சர்வதேச அணுகுமுறை, தமிழ் திரைப்படங்களின் வெளிச்சத்தை உலக சந்தையில் விரிவுபடுத்தும் முயற்சியாகும். உள்ளூர் பிரச்சினையை உலகளவில் பேச வைக்கும் ஒரு தளமாக இந்த பாடல் அமையும் என எதிர்பார்க்கப்படுகிறது.

‘கெவி’ திரைப்படம், 800 ஆண்டுகள் பழமையான வெள்ளகெவி கிராம மக்கள் அடிப்படை வசதிகளுக்காக நடத்தும் போராட்டத்தை மையமாகக் கொண்டது. விமர்சகர்களின் பாராட்டைப் பெற்ற இந்த படம், அதன் உள்ளடக்கத்தின் மூலம் சமூக அக்கறையை வலியுறுத்துகிறது.

இப்படத்தின் கிளைமாக்ஸ் பகுதி, தேர்தல் அரசியலைத் தாண்டி மனித வாழ்வின் அடிப்படை உரிமைகள் குறித்து பேசுகிறது. உலகின் பல மலைப்பகுதிகள் மற்றும் தொலைதூர கிராமங்களில் வாழும் மக்கள் எதிர்கொள்ளும் புறக்கணிப்பை சுட்டிக்காட்டும் வகையில் படைப்பு அமைந்துள்ளது.

இசைத் துறையில் பல்வேறு சர்வதேச கலைஞர்களுடன் இணைந்து உருவாக்கப்பட்ட ‘Set Me Free!’ பாடல், ஆங்கிலம் மற்றும் பிற மொழிகளில் வெளியிடப்பட உள்ளதால், இந்த திரைப்படத்தின் உலகளாவிய செல்வாக்கு மேலும் அதிகரிக்க உள்ளது.

தயாரிப்பாளர் மற்றும் ஒளிப்பதிவாளர் ஜெகன் ஜெயசூர்யா கூறுகையில், “இசை என்பது எல்லைகளைத் தாண்டும் ஒரு சக்தி. அந்த சக்தியை பயன்படுத்தி, வெள்ளகெவி மக்களின் குரலை உலகம் கேட்கச் செய்வதே எங்களின் நோக்கம்” என்றார்.

தற்போது ‘கெவி’ திரைப்படம் Netflix தளத்தில் பார்வைக்கு கிடைக்கிறது. மேலும் விரைவில் Amazon Prime Video தளத்திலும் வெளியாக உள்ளது.

சமூக உண்மைகளை மையமாகக் கொண்டு படங்களை உருவாக்கும் ஆர்ட்அப்டிரையாங்கிள்ஸ் ஃபிலிம் கம்பெனி, இந்த முயற்சியின் மூலம் “உள்ளூர் கதை – உலக குரல்” என்ற புதிய பாதையைத் திறந்துள்ளது.