Tuesday, August 4
Shadow

நாளை வெளியாகிறது கே.ஜி.எஃப் சேப்டர் 2 படத்தின் பர்ஸ்ட் லுக் போஸ்டர்…..

கேஜிஎஃப் படத்தின் இரண்டாம் பாகத்தின் வில்லன் சஞ்சய் தத்தின் போஸ்டர் நாளை வெளியிடப்படவுள்ளது.

கன்னட ஹீரோ யஷ் நடித்திருந்த கே. ஜி. எஃப் திரைப்படம் இந்தியா முழுவதும் நல்ல வரவேற்பை பெற்றது. கன்னடம் மட்டுமன்றி தமிழ், தெலுங்கு மற்றும் இந்தியிலும் இந்த படம் வெளியாகி பிரமாண்ட வசூலை குவித்தது. இதனை தொடர்ந்து கே.ஜி.எஃப் சேப்டர் 2 படம் தற்போது உருவாகி வருகிறது.

இந்த படத்தில் பாலிவுட் நடிகர் சஞ்சய் தத் வில்லனாக நடித்து வருகிறார். நாளை சஞ்சய் தத் பிறந்த நாள் என்பதால் அவருக்கு வாழ்த்துக் கூறும் விதமாக சஞ்சய் தத் போட்டோவுடன் கே.ஜி.எஃப் சேப்டர் 2 படத்தின் பர்ஸ்ட் லுக் போஸ்டர் வெளியிடப்படும் என அதிகாரப்பூர்வமாக அறிவிப்பு வெளிவந்துள்ளது. இயக்குனர் பிரசாந்த் நீல் இது பற்றி அதிகாரப்பூர்வ அறிவிப்பை ட்விட்டரில் வெளியிட்டுள்ளார்.

“The only way is the BRUTAL way!!” என அவர் அந்த ட்வீட்டில் குறிப்பிட்டுள்ளார். இந்த போஸ்டர் நாளை காலை 10 மணிக்கு வெளியிடப்படும் என அந்த போஸ்டரில் குறிப்பிட்டுள்ளனர். இந்த அறிவிப்பை சஞ்சய் தத் மற்றும் யஷ் ரசிகர்கள் சமூக வலைதளங்களில் கொண்டாடி வருகின்றனர். அதனால் #KGFChapter2 தேசிய தற்போது தேசிய டிரெண்டிங்கில் உள்ளது. இது வரை இரண்டு லட்சத்திற்கும் அதிகமான ட்வீட்கள் பதிவாகியிருக்கின்றன. கே.ஜி.எஃப் சேப்டர் 2 படத்தின் ஷுட்டிங் இறுதி கட்டத்தில் இருக்கும் நிலையில் கொரோனா பிரச்சனை காரணமாக அது தடைபட்டு இருக்கிறது குறிப்பிடத்தக்கது.

கே ஜி எஃப் படத்தின் இறுதியில் ராக்கி வில்லன் கருடனை கொல்வது போல காட்டப்பட்டிருக்கும். கருடனின் கட்டுப்பாட்டில் தான் கேஜிஎஃப் தங்க சுரங்கம் இருக்கும். அவனை ராக்கி கொன்று விட்டதால் தற்போது அடுத்து இந்த தங்க சுரங்கம் யார் கைவசம் செல்லும் என்பது தான் இரண்டாம் பாகத்தின் கதையாக இருக்கும். கருடனின் தம்பியாக இருக்கும் அதிரா ‘நீங்கள் இருக்கும் வரை நான் இந்த தங்க சுரங்கத்தை எடுத்துக்கொள்ள ஆசைப்பட மாட்டேன்’ என கருடனிடம் கூறியிருப்பார். ஆனால் தற்போது கருடன் இறந்துவிட்டதால் அவனது தம்பி அதிரா (சஞ்சய் தத்) இந்த இடத்திற்கு வர உள்ளார். ராக்கி மற்றும் அதிரா இடையே நடக்கும் மோதல் தான் கேஜிஎப் சேப்டர் 2 ஆக இருக்கும் எனது பார்க்கப்படுகிறது.

முதல் பாகம் மிக பிரம்மாண்ட ஹிட் ஆன பிறகு தான் இரண்டாம் பாகத்திற்கு பட்ஜெட் அதிகரிக்கப்பட்டு அதில் சஞ்சய் தத் நடிக்க வைக்கப்படுகிறார்.அதிராவின் கதாபாத்திரம் முதல் பாகத்தில் பெரிய அளவில் காட்டப்படவில்லை என்பது குறிப்பிடத்தக்கது.

இதற்கு முன்பு இது பற்றி நடிகர் சஞ்சய் தத் அளித்த பேட்டி ஒன்றில் ‘அதிரா கதாபாத்திரம் மிகவும் பவர்புல்லானது. அவெஞ்சர்ஸ் படத்தில் வரும் தானோஸ் கதாபாத்திரம் போன்றது. அந்த அளவுக்கு மிகவும் பவர்ஃபுல்லாக இருக்கும். முதல் பாகத்தில் சரியாக காட்டவில்லை என்றாலும் இரண்டாம் பாகத்தில் முழுக்க முழுக்க அதிராவின் கதாப்பாத்திரம் தான் இருக்கும். இது போன்ற ஒரு ரோலில் நடிக்கத் தான் நான் எதிர்பார்த்து காத்திருந்தேன். அது எனக்கு தற்போது வந்திருக்கிறது” என சஞ்சய் தத் கூறியிருக்கிறார்.

அக்டோபர் 23 2020இல் கேஜிஎஃப் சேப்டர் 2 வெளியாகும் என அறிவிக்கப்பட்டு இருந்தாலும் கொரோனா காரணமாக பணிகள் தடைபட்டு இருப்பதால் அந்த தேதியில் படத்தை வெளியிட முடியுமா என்பது தற்போது கேள்விக்குறியாகவே இருக்கிறது.