அன்பில் அவன் – முதல் பாதி அன்பு… இரண்டாம் பாதி மசாலா ஆக்சன்!

காதல், குடும்ப உணர்வு, ஆக்ஷன், சஸ்பென்ஸ் என பல அம்சங்களை ஒன்றாகக் கலந்து உருவாகியிருக்கும் திரைப்படம் ‘அன்பில் அவன்’. அசோக் செல்வன் – ப்ரீத்தி முகுந்தன் இணையின் நடிப்பில் உருவாகியிருக்கும் இப்படம், ஒரு புதுமணத் தம்பதியின் கனவும், அந்தக் கனவுக்குள் எதிர்பாராதவிதமாக நுழையும் ஆபத்தும் பற்றிய கதையாக விரிகிறது.

படத்தின் மிகப்பெரிய பலமே அதன் முதல் பாதிதான். காதலித்து திருமணம் செய்துகொண்டு, குடும்பத்தினரின் எதிர்ப்பை மீறி தங்களுக்கென ஒரு சிறிய உலகத்தை அமைத்துக்கொள்ளும் அசோக் செல்வனும் ப்ரீத்தி முகுந்தனும், ஏழு ஆண்டுகளாக எளிமையான வாழ்க்கையை வாழ்ந்து வருகின்றனர். வசதியான குடும்பத்தைச் சேர்ந்த ப்ரீத்தி முகுந்தனும், நடுத்தரக் குடும்பத்தைச் சேர்ந்த அசோக் செல்வனும் காதலுக்காக எடுத்த முடிவும், அதன் பிறகு அவர்கள் இணைந்து வாழும் வாழ்க்கையும் இயல்பாகக் காட்சிப்படுத்தப்பட்டுள்ளது.

இருவருக்கும் இடையேயான காதல், புரிதல், குடும்ப வாழ்க்கை ஆகியவை படத்தின் முதல் பாதிக்கு நல்ல அழுத்தத்தைத் தருகின்றன. குறிப்பாக அசோக் செல்வன் – ப்ரீத்தி முகுந்தன் இடையேயான கெமிஸ்ட்ரி திரையில் ரசிக்கும்படியாக இருக்கிறது. அவர்களின் நடிப்பில் செயற்கைத்தனம் இல்லாமல், ஒரு சாதாரண தம்பதியின் வாழ்க்கையைப் பார்க்கும் உணர்வு ஏற்படுகிறது.

ஒரு கட்டத்தில், ப்ரீத்தி முகுந்தன் நட்சத்திர ஹோட்டலில் பணிபுரிவதைப் பார்க்கும் அசோக் செல்வன், அவளுக்காக தான் கொடுத்த வாக்குறுதியை நினைவுகூர்கிறார். அந்த வாக்குறுதியை நிறைவேற்ற வேண்டும் என்ற எண்ணத்தில் கடன் வாங்கி, ஒரு பிரம்மாண்டமான பங்களாவை வாங்குகிறார். அந்த இடத்தில் ஒரு விடுதியை நடத்தி, தங்களுக்கென ஒரு புதிய வாழ்க்கையைத் தொடங்க வேண்டும் என்பதே அவர்களின் கனவு.

ஆனால், அந்தக் கனவு தொடங்கும் இடத்தில்தான் ‘அன்பில் அவன்’ வேறு ஒரு பாதைக்குத் திரும்புகிறது.

அந்த பங்களாவையும், அவர்கள் தொடங்க நினைக்கும் வாழ்க்கையையும் சுற்றி உருவாகும் பிரச்சனைகள், அந்தப் பகுதியின் அரசியல் பின்னணி மற்றும் எம்.எல்.ஏ. தொடர்பான சிக்கல்கள் என கதை மெல்ல மெல்ல ஆக்ஷன் த்ரில்லர் களத்துக்குள் நுழைகிறது.

முதல் பாதியில் காதலையும் குடும்ப உணர்வுகளையும் கவனமாகக் கையாண்ட இயக்குநர், இரண்டாம் பாதியில் அதே கவனத்தைத் தொடரத் தவறியிருப்பது படத்தின் மிகப்பெரிய குறையாகத் தெரிகிறது. இரண்டாம் பாதியில் பல திருப்பங்கள் இருந்தாலும், அவற்றை வலுவான திரைக்கதையுடன் இணைக்க முடியாத சில இடங்கள் படத்தின் வேகத்தைக் குறைக்கின்றன.

குறிப்பாக, முதல் பாதியில் கதாபாத்திரங்களின் வாழ்க்கையையும் அவர்களது உணர்வுகளையும் நெருக்கமாகக் காட்டிய விதம் இரண்டாம் பாதியில் குறைந்து, ஆக்ஷன் மற்றும் த்ரில்லர் சம்பவங்கள் முன்னிலை பெறுகின்றன. இதனால் கதையுடன் பார்வையாளருக்கு ஏற்பட்டிருந்த உணர்வுப்பூர்வமான தொடர்பு சில இடங்களில் தளர்கிறது.

இரண்டாம் பாதியின் திரைக்கதையில் இன்னும் கொஞ்சம் கவனம் செலுத்தியிருந்தால், ‘அன்பில் அவன்’ ஒரு வித்தியாசமான முழுமையான திரைப்பட அனுபவமாக மாறியிருக்க வாய்ப்பு இருந்திருக்கும்.

அதே நேரத்தில், படத்தை முழுமையாகத் தவிர்க்கக்கூடிய திரைப்படம் என்றும் சொல்லிவிட முடியாது. காதல், குடும்ப உணர்வு, ஆக்ஷன், சஸ்பென்ஸ் என பல்வேறு அம்சங்களை இணைக்க முயன்றிருப்பது பாராட்டத்தக்கது. அறிமுக இயக்குநரான ஆர். கார்த்திகேயன் ராமகிருஷ்ணன், பல படங்களின் அனுபவம் கொண்ட இயக்குநரைப் போல படத்தை கையாள முயன்றிருப்பது தெரிகிறது. குறிப்பாக கதையின் முதல் பாதியை அவர் கையாண்டிருக்கும் விதம் கவனிக்க வைக்கிறது.

நடிப்பு

அசோக் செல்வன் தனது கதாபாத்திரத்தை இயல்பாகக் கையாண்டிருக்கிறார். காதலனாகவும், கணவனாகவும், குடும்பத்திற்காக போராடும் மனிதராகவும் அவரது நடிப்பு கதைக்கு பொருத்தமாக அமைந்துள்ளது.

ப்ரீத்தி முகுந்தனும் கதாபாத்திரத்தின் உணர்வுகளை சிறப்பாக வெளிப்படுத்தியிருக்கிறார். இருவருக்கும் இடையேயான காட்சிகளே படத்தின் உணர்வுப்பூர்வமான பகுதிகளுக்கு வலு சேர்க்கின்றன.

படத்தில் நடித்துள்ள மற்ற நடிகர்களும் தங்களுக்குக் கொடுக்கப்பட்ட கதாபாத்திரங்களுக்கு ஏற்ற வகையில் சிறப்பாக நடித்துள்ளனர்.

இசை மற்றும் தொழில்நுட்பம்

படத்தின் முக்கியமான பலங்களில் ஒன்று தொழில்நுட்பக் குழுவின் பங்களிப்பு.

கோவிந்த் வசந்தாவின் இசை படத்தின் காதல் காட்சிகளுக்கு மென்மையையும், த்ரில்லர் காட்சிகளுக்கு பதற்றத்தையும் சேர்க்கிறது. பாடல்கள் ரசிக்கும்படியாக இருப்பதுடன், பின்னணி இசையும் பல காட்சிகளுக்கு கூடுதல் வலு சேர்க்கிறது. எதிர்பாராத வகையில் இடம்பெறும் மசாலா பாடல்களும் படத்தின் வணிகத் தன்மைக்கு துணைபுரிகின்றன.

ஒளிப்பதிவும் குறிப்பாக குறிப்பிடத்தக்கது. மலைப் பிரதேசப் பின்னணியைப் பயன்படுத்தியிருக்கும் விதம் படத்திற்கு அழகையும், அதே நேரத்தில் ஒரு மர்மமான சூழலையும் உருவாக்குகிறது. பங்களாவைச் சுற்றிய காட்சிகளிலும் அந்தச் சூழல் கதையின் த்ரில்லர் தன்மையை அதிகரிக்கிறது.

படத்தொகுப்பும் முதல் பாதியின் காதல் காட்சிகளுக்கும், இரண்டாம் பாதியின் ஆக்ஷன் காட்சிகளுக்கும் தேவையான வேகத்தை உருவாக்க முயற்சிக்கிறது.

மொத்தத்தில்…

‘அன்பில் அவன்’ – முதல் பாதி ‘அன்பு’, இரண்டாம் பாதி ‘சிடுசிடு’!

காதல் மற்றும் குடும்ப உணர்வுகளை மையமாக வைத்து தொடங்கும் படம், இடைவேளைக்குப் பிறகு ஆக்ஷன் த்ரில்லர் பாதைக்குச் செல்கிறது. முதல் பாதியில் காட்டப்பட்ட அதே கவனமும், இறுக்கமான திரைக்கதையும் இரண்டாம் பாதியிலும் இருந்திருந்தால், படம் இன்னும் உயர்ந்த அனுபவத்தைத் தந்திருக்கும்.

அசோக் செல்வன் – ப்ரீத்தி முகுந்தன் நடிப்பு, கோவிந்த் வசந்தாவின் இசை, ஒளிப்பதிவு மற்றும் தொழில்நுட்பக் கலைஞர்களின் பங்களிப்பு ஆகியவை படத்தின் முக்கியமான பலங்கள்.

ஆனால் இரண்டாம் பாதியில் திரைக்கதையில் ஏற்படும் சில தடுமாற்றங்கள் படத்தின் மொத்த அனுபவத்தைச் சற்றுக் குறைக்கின்றன.

முழுமையான சிறப்பான படம் என்ற அந்தஸ்தைத் தொடவில்லை என்றாலும், காதல் மற்றும் த்ரில்லர் கலந்து உருவாகியிருக்கும் ஒரு சராசரிக்கும் மேலான திரைப்படமாக ‘அன்பில் அவன்’ அமைந்திருக்கிறது.