Friday, September 18
Shadow

கயிறு திரை விமர்சனம் (பாடம்) Rank 3.5/5

இயக்குநர் ஃபாசிலிடம் உதவி இயக்குநராக இருந்த கணேஷ் இயக்கியுள்ள கயிறு திரைப்படம். ஸ்கைவே பிக்சர்ஸ் தயாரிக்கும் இப்படத்தில் குணா (படத்தின் இணை தயாரிப்பாளரும் இவரே), காவ்யா மாதவ், கந்தசாமி, சேரன்ராஜ் முக்கிய கதாபாத்திரங்களில் நடித்துள்ளனர். பிரித்வி மற்றும் விஜய் ஆனந்த் இப்படத்துக்கு இசையமைத்துள்ளனர். ஒளிப்பதிவு ஜெயன் உன்னிதன், எடிட்டிங் கார்த்திக்.

தமிழ் சினிமாவில் புதுமுகங்கள் நடிக்கும் படங்கள் அடிக்கடி வந்து கொண்டுதான் இருக்கின்றன. அவற்றில் சில படங்கள் மட்டுமே ஓரளவிற்கு நல்ல கதையுடனும், உருவாக்கத்திலும் ரசிக்கும்படியாக உள்ளன. இந்தப் படத்தில் ஒரு மனிதனுக்கும், மாட்டிற்கும் இடையில் இருக்கும் பாசப்பிணைப்பை நெகிழ்ச்சியாக சொல்லியிருக்கிறார்கள். இந்த படத்தின் விமர்சனத்தை இங்கே பார்க்கலாம்.

பரம்பரை பரம்பரையாய் பூம்பூம் மாடு வைத்துக் கொண்டு ஜோசியம் சொல்லி பிழைப்பு நடத்துபவர் குணா. ஒரு பிரச்சினை காரணமாக சொந்த ஊரை விட்டு வெளியேறி வேறு ஊருக்கு குடி பெயர்கிறார். அந்த ஊரில் காவ்யா மாதவ்வைப் பார்த்து காதல் கொள்கிறார். ஆனால், காவ்யாவின் அம்மா குணா, பூம்பூம் மாடு வைத்து பிழைப்பு நடத்துவதை விட்டு வேறு வேலைக்குச் சென்றால் தான் தன் பெண்ணைத் திருமணம் செய்து கொடுப்பேன் என்கிறார். குணா, காவ்யா திருமணத்திற்குத் தான்தான் இடைஞ்சலாக இருக்கிறோம் என நினைக்கும் குணாவின் மாடு நள்ளிரவில் கயிறை அறுத்துக் கொண்டு எங்கோ ஓடி விடுகிறது. மாட்டைக் காணாமல் தவித்துப் போய் தேடுகிறார் குணா. அதன் பின் என்ன நடக்கிறது என்பதுதான் மீதிக் கதை.

பூம்பூம் மாடு வைத்து பரம்பரைத் தொழில் செய்யும் இளைஞராக ஹீரோ குணா. சினிமாத்தனம் இல்லாத தோற்றத்தில் யதார்த்தமான நடிப்பை வெளிப்படுத்தியிருக்கிறார்.

நாயகியாக காவ்யா மாதவ். இவரும் சினிமாத்தனம் இல்லாத தோற்றத்தில் ஒரு கிராமத்தில் வசிக்கும் பூக்காரப் பெண் எப்படியிருப்பாரோ அப்படியே இருக்கிறார். குணாவைப் பார்த்ததும் ஏன் காதல் கொள்கிறார் என்பதற்கான அழுத்தமான காரணம் எதுவும் இல்லை. இருப்பினும் தன் காதலில் உறுதியாக இருக்கிறார்.

ஒரு மாட்டின் மீது அதன் உரிமையாளர்கள், வளர்ப்பவர்கள் எவ்வளவு பாசமாக இருப்பார்கள் என்பதை நெகிழ்வுடன் கொடுத்திருக்கிறார் இயக்குனர். படத்தின் கிளைமாக்சில் ஆணித்தரமான கருத்தைப் பதிவு செய்திருக்கிறார்.

இப்படம் அமெரிக்காவில் நடைபெற்ற தி கிரேட் சினிமா நவ் திரைப்பட விழாவில் சிறந்த படத்துக்கான விருது, மெக்சிகோவில் நடந்த 7 கலர்ஸ் பேச்சிலர்ஸ் சர்வதேச திரைப்பட விழாவில் சிறந்த நடிகருக்கான விருது உள்ளிட்ட 6 சர்வதேச விருதுகளை வென்றுள்ளது.

ரஷ்யாவில் நடைபெற்ற யூரேசியா சர்வதேச மாதாந்திர திரைப்பட விழா, கொலம்பியா சினிமே லேப் மற்றும் இரானில் நடந்த சர்வதேச திரைப்பட விழாவில் சிறந்த படத்துக்கான இறுதிப்பட்டியலிலும் கயிறு திரைப்படம் இடம்பெற்றது.

அதுமட்டுமல்ல. இங்கிலாந்து, நஜீரியா தொடங்கி அமெரிக்கா வரை, இப்படம் லண்டன் சர்வதேச திரை விருது விழா, மேற்கு ஆப்பிரிக்காவில் நடைபெற்ற மலபோ சர்வதேச இசை மற்றும் திரைப்பட விழா மற்றும் அமெரிக்காவில் நடைபெற்ற மாண்ட்கோமெரி சர்வதேச திரைப்பட விழா உள்ளிட்ட பெரும் திரைப்பட விழாக்களில் சிறந்த திரைப்படத்துக்கான அதிகாரப்பூர்வ பட்டியலில் இடம்பிடித்தது.

சுருக்கமாக, இப்படம் உலகம் முழுவதும் நடந்த 20 திரைப்பட விழாக்களில் தன்னுடைய முத்திரையை பதிவு செய்திருக்கிறது. உலகம் முழுவதும் உள்ள சினிமா ரசிகர்களின் இதயங்களை ஆக்கிரமித்த பிறகு தற்போது அது யாருக்காக உருவாக்கப்பட்டதோ அந்த தமிழ் ரசிகர்களின் இதயங்களை வெல்ல வந்திருக்கிறது.