Monday, December 5
Shadow

கார்கி திரை விமர்சனம் (ரேட்டிங் 4.5)

சாய் பல்லவி நடிப்பில் சூர்யா, ஜோதிகாவின் 2டி நிறுவனம் வெளியிட்டுள்ள ‘கார்கி’ படத்தின் திரை விமர்சனத்தை இங்கே பார்க்கலாம்.

ஒன்பது வயது குழந்தையை நான்கு வடமாநில இளைஞர்கள் கற்பழித்து விடுகின்றனர். இந்த செய்தி மக்களிடையே பெரும் அதிர்ச்சியை ஏற்படுத்தி விடுகிறது. இந்த குற்ற செயலில் ஈடுபட்ட ஐந்தாவது நபராக சாய் பல்லவியின் அப்பா ஆர்.எஸ். சிவாஜியும் கைதாகிறார். இதனால் சாய்பல்லவி குடும்பம் பெறும் இன்னல்களுக்கு ஆளாகிறது. சட்ட போராட்டங்களின் மூலம் தனது அப்பாவை மகள் காப்பாற்றினாரா?இறுதியில் அவருக்கு என்ன ஆனது என்பதே கார்கி படத்தின் கதை.

கார்கி படத்தில் சாய் பல்லவி பள்ளி ஆசிரியராக நடித்துள்ளார். எந்தவித பெரிய மேக்கப்பும் இல்லாமல், மிகவும் எளிமையாக படம் முழுக்க நமது பக்கத்து வீட்டு பெண் போலவே காட்சியளிக்கிறார். சாய்பல்லவியின் எதார்த்தமான நடிப்பும், அழுத்தமான திரைக்கதையும் படத்தின் வெற்றிக்கு வலு சேர்க்கிறது.

வழக்கறிஞராக வரும் காளி வெங்கட்டும் தனக்கு கொடுக்கப்பட்ட வேலையை கச்சிதமாக செய்துள்ளார். படத்தில் நடித்துள்ள மற்ற நடிகர்களான ஆர் எஸ் சிவாஜி,சரவணன், ஜெயபிரகாஷ், ஐஸ்வர்யா லட்சுமி உள்ளிட்டோர் தங்களுக்கு கொடுக்கப்பட்ட கதாபாத்திரங்களுக்கு நியாயம் சேர்த்துள்ளனர். அப்பாவை காப்பாற்ற சட்டத்தின் வாயிலாக போராடும் ஒரு மகளின் கதையை தத்ரூபமாக எந்தவித சினிமா தனமும் இல்லாமல் நேர்த்தியாக கொடுத்துள்ளார் இயக்குனர் கௌதம் ராஜேந்திரன்.

திருநங்கைகள் நீதிபதியாக வந்தாலும் அவர்களை இந்த சமூகம் எப்படி பார்க்கிறது. ஒருவர் தவறுதலாக ஒரு பெரிய வழக்கில் கைதாகும் பொழுது அவரும் அவரது குடும்பத்தினம் என்ன விதமான இன்னல்கள் சந்திக்கின்றனர். அவர்களை இன்றைய மீடியா எவ்வாறு சித்தரிக்கிறது என்பதை அழுத்தம் திருத்தமாக படத்தில் பதிவு செய்துள்ளனர்.

படத்தின் பிளஸ்:
சாய்பல்லவியின் எதார்த்தமான நடிப்பும், அழுத்தமான திரைக்கதையும் படத்தின் வெற்றிக்கு வலு சேர்க்கிறது.

நாளுக்கு நாள் அதிகரித்து வரும் பெண்களுக்கு எதிரான குற்றங்கள் குறித்து பலவிதமான விவாதங்களை இந்தப்படம் நிச்சயமாக எழுப்பும். பெண்கள் குறிப்பாக குழந்தைகள் சந்திக்கும் பிரச்சனைகளின் எதிரொலியாக ‘கார்கி’ படம் அமைந்துள்ளது.

மொத்தத்தில் பெண் குழந்தைகளை பெற்றவர்கள் நிச்சயமாக பார்க்க வேண்டிய படம் ‘கார்கி’.